جهاز آيفون فايف جديد

بسم الله الرحمن الرحيم

موضوع هذه المقالة وايد بسيط مافي شي، بس اهو مجرد توضيحات بسيطه ويمكن في بعض المعلومات اللي نتجاوزها من غير فهمها او من غير معرفة الهدف من هذي الخيارات.

مثل ما اهو موضح عندكم بالفيديو خطوات تشغيل الجهاز.

مجرد انك تشتري جهاز ايفون يديد لازم تمر عليك هذي الصفحات … طبعا بالفيديو اشرح التشغيل حق جهاز ايفون فايف طبعا راح تلاقي في اختلافات بسيطة مع الايفون فايف اس … ان شالله راح نقدر انغطي الموضوع و اي استفسار اتمنى تكتبونه لي سواء كان يخص الموضوع او مايخصه، وان شالله ما اقصر معاكم.

راح اكتب الحين الخطوات خطوة خطوة مع شرح كل اللي ينذكر بالفيديو، عشان اذا ماكنت تقدر تسمع الصوت راح تفهم الموضوع من القراءة

١- مجرد انك تشغل الجهاز في البدايه راح تظهرلك شاشة الترحيب الرئيسية، فكرتهم ان يرحبون بكل اللغات على مستخدمين الجهاز.

طبعا هالشاشه مو محتاجه اي شرح او توضيح، مجرد انك تمسح على الشاشه راح ننتقل حق الصفة اللي بعدها و نبدي نشتغل جد.

٢- الصفحة الثانية اهي عبارة عن شاشة اختيار الواي فاي، راح تظهرلي كل اجهزة الواي فاي الموجودة بالمكان، اختار جهازي بعدها اكتب الرقم السري او كلمة السر واتابع الموضوع.

شركة ابل قبل ماكانت تسمح بهالموضوع، كان لازم توصل تلفونك بجهاز كمبيوتر و يكون واصل على النترنت عشان يتفعل الجهاز وتقدر تشغلة، بس الحين وجود انترنت من غير جهاز كمبيوتر يمكنك من تشغيل الجهاز و تفعيلة مع شركة ابل

وطبعا ادري ان الكل عرف الرقم السري حق الواي فاي عندي، لاتستانسون وايد، غيرته خلاص.

٣- شاشة ارسال الموقع. هذي من اهم الشاشات اللي تخلي الناس تقول “بطاريتي بسرعة اطير” تقدر تشغلها او ماتشغلها على راحتك، وان شاء الله راح اشرح بفيديو ثاني شلون تقدر تغير هالاختيار من الاعدادات داخل الجهاز.

٤- الشاشة اللي بعدها حق الناس اللي اساسا عندهم جهاز ايفون و ماخذين واحد يديد او ان مسوين حق الجهاز ريستور.

الخيار الاول واضح ان اختار الجهاز كجهاز يديد وماله داعي اي شرح بهالموضوع.

الخيار الثاني اذا كان عندك جهاز ايفون قديم و كنت حافظ بياناتك كلها بال iCloud تضغط عليه و يطلب منك اكاونتك مع كلمة السر عشان يسحب كل اللي انت حافظة.

الخيار الثالث نفس الثاني بالضبط بس بدل ماتكون حافظ بياناتك عال iCloud تكون حافظها على جهاز كمبيوتر عن طريق برنامج ال iTunes.

5- الشاشة اللي بعدها راح تشوفون اختيارين اساسيين مع اختيار مكتوب بخط صغير تحت.

الخيار الاول ان يكون عندك اكاونت بال app store تضغط عليها وتحط اكاونتك و الحياة سعيده

الخيار الثاني انك تسوي اكاونت يديد “هذا حق اللي توهم ياخذون ايفون اول مره او ماعندهم اكاونت و يبون يسوون واحد او ناسين اكاونتهم و يبون يسوون واحد”.

طبعا اجاراءاتها طويلة شوي، تختار هالاختيار هذا يدخلك على صفحة تحط فيها بياناتك، اسمك تاريخ ميلادك عنوانك و رقم الفيزا وكل شي يطلبونه منك لازم تكتبه، طبعا في ناس تقول “يصير اسوي اكاونت بدون فيزا؟” … الجواب طبعا يصير بس مو من هني راح اشرحها بعدين ان شالله.

الخيار الاخير اللي مكتوب بالخط الصغير Skip this step هذا الخيار عشان تأجل موضوع انك تحط اكاونتك او تسوي اكاونت و هم حق اللي مايبون يحطون الفيزا مالتهم.

٦- ادري ان محد راح يقرا الشروط و الاحكام هههههههههه، نضغط على الموافقة بالزاويه تحت عاليمين، واذا ماوافقت ماراح يشتغل الجهاز، فغصبا علينا كلنا انوافق عاللي يبونه ههههههههههههه

 ٧- الشاشه هذي تقدر تحدد فيها الرقم السري اذا تبي جهازك يكون له رقم سري، و تقدر تسويها بالاعدادات بعدين.

٨- شاشة الغالية siri طبعا هم تقدر تفعلها من البداية او تخليها بعدين تشغلها من الاعدادات.

٩- في هذي الشاشه شركة ابل تستأذن منكم او تطلب الاذن انها ترسل من جهازكم رسايل بالمشاكل اللي تواجه الجهاز، طبعا اذا وافقت راح ترسم المشاكل حق الشركة من غير علمكم لأنكم اساسا وافقتوا على الارسال. وكاتبين لكم انهم ممكن يستخدمون رسائل قصيره او يستخدمون خدمة الانترنت. وهم راح يرسل حق الشركة مكانك، يعني غير انهم يستخدوم النت منك يعرفون مكانك. هههههههه

١٠- بعدها الشاشة النهائية، يرحبون فيك، تضغط على Get Started ويفتح معاك الجهاز وسلامتكم.

اي استفسار حياكم

اي ملاحظة حياكم

اي تعديل على اي معلومة قلتها او كتبتها مشكورين مقدما، راح تفيدني وتفيدكم

وسامحوني اذا في بدليات وايد :p

شاهد أيضاً

MovieBox in IOS على اجهزة التفاحة

بسم الله الرحمن الرحيم طريقة تثبيت برنامج ال MOVIEbox على انظمة التفاحه مثل الايفونات و …

4 تعليقات

  1. لوسمحت انا نسيت الباسوورد حق الايفون واكثر من مره دخلته غلط وطلع لي تم ايقاف الايفون ،،انا اعرف انزل اصدار من جديد من الايتونز بس خايفه معلوماتي تضيع من صور واسماء وغيره شلون ممكن عالاقل ارجع لوحة القفل ،،مع العلم اني جربت طريقه الدسكفري مود ومانفعت وجربت اطفي الجهاز فتره طويله ومانفعت

    • اخوي سعد،

      في البداية آسف عالتأخير بس للأسف انت جربت اكثر الباسوورد وايد على هالأساس الجهاز قفل، ماراح يشتغل الا عن طريق ريستور، وبالنسبة حق بياناتك اذا كنت حافظها عن طريق الاي كلاود او عن طريق الكمبيوتر ان شالله ماراح تروح.

      طبعا اللي قاعد يصير لك ممكن انت تشوفه ضرر بس اهو بالصج لمصلحت مستخدمين الايفون، عشان لا سمح الله انباق الجهاز محد يقدر يسحب البيانات او الصور من الجهاز.

      ان شالله تكون باخذ باك اب وتقدر ترجع كل بياناتك

      • انزين انا حاولت اسوي ريستورت طلع لي اني لازم اسكر العثور ع الايفون والجهاز مقفل ب تم ايقاف الايفون ///كل ما احاول اكمل الريستورت يطلع لي اني لازم اوقف البحث ع الايفون

        ماعليه اخر سؤال ؛)
        هل صحيح اني بعد ماامسح الصور من الايفون واسويله اعادة ضبط المصنع وابيعه ممكن ان يسترجعون الصور

        • بالنسبة حق موضوع الريستور
          اذا انت عارف الباسوورد اتبع الطريقة اللي الحين بقولها لك و اذا موعارف الباسوورد التلفون مامنه فايدة
          سكر الجهاز … اضغط على زد الهوم اللي تحت … وانت ضاغط عليه وصله بالكمبيوتر من غير ماتشيل ايدك … هني الجهاز اجباري راح يحتاج ريستور من غير مايطلب منك تسكير الفايدمي … بس حط في بالك
          اول مايشتغل الجهاز بعد الريستور راح يطلب منك الباسوورد مالك الاكاونت اللي انت حاطة حق الفايدمي

          بالنسبة حق الموضوع الثاني
          دورت اكثر من طريقه بس ليلحين ماحصلت طريقة ترجعلي الملفات الممسوحه … بالنسبة حق الاجهزة الثانيه مثل السامسونج او غيره وايد سهله و لقيت اكثر من طريقه … اما بالنسبه حق الايفون ليلحين مالقيت
          بس حط في بالك شي
          ماكو شي مستحيل بالتكنولوجيا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *